ئەرکێن زمانی د سترانێن کەنالێ (پێلستانک) دا

ستران، ئێکە ژ ئالاڤێن گرنگێن کارتێکرنێ ل رەفتار و کەسایەتییا پاشەرۆژێ یا زارۆکی دکەت. ئێک ژ پێکهاتەیێن هەری گرنگێن سترانا زارۆکان، زمانە. لسەر بنەمایێ چەوانییا بکارئینانا زمانی د سترانێدا، ئەرکێن وی زمانی د پرۆسێسا گەهاندنێدا دهێنە گوهۆرین. ئانکو، تا راددەیەکێ باش، چەوانییا بکارئینانا زمانی د تێکستێ سترانێدا، شێوێ کاریگەرییا سترانێ لسەر زارۆکێ دەستنیشان دکەت. ئێک ژ تیۆریێن گرنگ و سەرەکی د دەستنیشانکرن و شرۆڤەکرنا کاریگەرییا پێکهاتەیا زمانی لسەر وەرگری، تیۆرییا (ئەرکێن زمانی د کریارا گەهاندنێ دا) یە، ئەوا ژ لایێ (رۆمان یاکوبسون)ی ڤە هاتیە پێشڤەبرن. د ڤێ ڤەکۆلینێدا، ٣١ سترانێن زارۆکا یین کەنالێ پێلستانک هاتینە هەلبژارتن و تیۆرییا ناڤبری، پشتی ب تێروتەسەلی هاتیە شرۆڤەکرن، لسەر تێکستێن سترانێن هەلبژارتی هاتیە پراکتیککرن، داکو ب رێبازەکا سالۆخکاری، ئاماری و شرۆڤەکاری، کاریگەرییا سترانێن هەلبژارتی، ب رێکا دەستنیشانکرنا ئەرکێن زمانێ وان سترانان، لسەر زارۆکێ وەرگرێ وان سترانان، بهێنە دەستنیشانکرن و شرۆڤەکرن. ئارمانجا سەرەکی ژ ڤێ ڤەکۆلینێ، ئەنجامدانا هەلسەنگاندنەکا زانستیيانەیا میناکەکا سترانێن زارۆکانە و جۆرێ کاریگەرییا وان سترانان لسەر زارۆکییە، داکو سترانا زارۆکا بشێت ب شێوەیەکێ پەروەردەیی یێ ساخلەم و ئەرێنی رۆلێ خۆ د ئاڤاکرنا زارۆکیدا بگێریت.