گەشتا قارەمانێ "مەندێ ترسنۆک" ل دویڤ مۆدێلا تاک ئەفسانەییا (جۆزێف کامبل)ی

جۆزێف کامبل ئەفسانەناسێ ئەمریکی، خودانێ مۆدێلەکا نوی و داهێنەرانەیە، ئەو مۆدێلا مینا یاسایەکا گشتی ل سەر پرانییا ئەفسانە و چیرۆکێن فۆلکلۆریێن جیهانی دهێتە پەیرەوکرن. ئەوی مۆدێلا تاک ئەفسانەییا خوە ل سەر بنەمایێ بۆچوونێن یۆنگی سەبارەت نەستی دانا. کامبل پشتی کۆمکرنا پترییا ئەفسانەیێن جیهانی شیا بگەهیتە مۆدێلەکا ئێکگرتی دەربارەی قارەمانی. ئەو قارەمانێ یۆنگ وەکو ئێک ژ گرنگترین جۆرێ نموونەیێن دەستپێکی دزانیت. ئەوی پشتی گرێیا پترییا ئەفسانەیێن جیهانی شرۆڤەکری دیار بوو؛ قارەمانێن هەمی ئەفسانەیان، خودان بنەما و کارەکتەرەکێ هەڤگرتینە. قارەمانێن هەمی ئەفسانەیێن قارەمانی ژ بۆ وەرارکرن و گەهشتنێ دەست ب گەشتەکی دکەن و ژ سێ قۆناغێن (چوون و بجهـ هێلان، دەستپێکرن، زڤرین) دەرباز دبن. د نوکەدا ئەڤ مۆدێلە هندە د بیاڤێن جۆراوجۆرێن ئەدەب و هونەرێدا بەربەلاڤە و جهێ خوە د ڤەکۆلینێن ئەدەبیدا گرتییە لەوما دشیاندایە ئەڤ مۆدێلە ل سەر دەقێن ئەدەبێ -ئەفسانەیێن- کوردى ژى بهێتەپراکتیککرن . هەر ژ بۆ ئەڤێ مەبەستێ ئەفسانەیا "مەندێ ترسنۆک" ژ پەرتوکا "نارینا گۆلبارین" هاتییە هەلبژارتن. پشتی پراکتیککرنا مۆدێلا کامبلی دیار بوو، چەند ویستگەهـ ژ مۆدێلێ د ئەفسانا "مەندێ ترسنۆک"دا نەهاتنە دیتن، لێ ئەفسانەیا "مەندێ ترسنۆک" هەڤ شێوێ پرانییا ئەفسانەیێن جیهانی، خودان قارەمانەکە کو ب مەبەستا وەرار د بوارێ دەروونی و مەعنەویدا دەست ب گەشتەکا سێ قۆناغی دکەت